Kurs og timeplan

Dagane på Sommarleir er fylt av kurs, sosiale aktivitetar, kos og hygge. Det er mykje rom for både å lære seg nye ting samtidig som du får nye vennar frå heile Noreg.

Første dag blir alle tekne godt i mot og vi skal bruke tida på å bli kjent med kvarandre. I 2026 dreg vi på utflukt allereie tysdag og startar dagen med kjekke opplevingar for å bli betre kjent. Siste dag avsluttar vi med lunsj før avskjed og heimreise.

Meir informasjon om første og siste dag på leir finner du her.

Her finn du nedlastbar versjon av timeplanen.

Har du lyst til å lære deg å brodere plattsaum?

Kanskje du har ein draum om å ein dag sy din eigen bunad - heilt sjølv?
På Sommarleir 2026 vil du få moglegheit til å vere med på langkurs med ein erfaren handverkar som lærer deg heilt grunnleggande broderiteknikk. I løpet av kurset vil du brodere ein prøvelapp med mønster frå Hulda-bunaden.

Kva du vil bruke prøvelappen til, bestemmer du heilt sjølv. Kanskje blir det eit fint bilde til å henge opp, ein fin detalj til å sy på klede eller ei veske, eller kva med eit lite pennal?

Hulda Garborg var ein pionèr innan både bunads-, teater- og folkedansarbeid. Ho vart utnemnd til heidersmedlem i Noregs Ungdomslag.

Dette kurset er for deg som spelar eit folkemusikkinstrument og vil lære speltradisjonen frå Sunnmøre og Nordfjord. Her blir det gamle og nye slåttar, i tradisjonell form og i arrangert samspel.

Instruktør på kurset er Åsmund A. Farstad. Han tek utgangspunkt i speltradisjonane frå Sunnmøre, ein særeigen tradisjon med stor breidde og lang historie. Trass gullgruva som tradisjonen er, blir den for lite spela. Så her får du sjansen til å dykke ned i skattekista. Sunnmøre grensar til Nordfjord, og tradisjonane frå desse områda er gode vener, så viss Åsmund tek deg med på ein tur over fylkesgrensa, må du ikkje bli overraska.

Åsmund ser fram til å lære vekk dansemusikk, lydarskåttar, setertonar, hallingar, springarar, valsar og meir frå sitt tradisjonsområde. På kurset vil du bli kjent med spelemenn som Vika-Petter, Syvdsnesen, Gamle-Brendfuren og mange fleire.

Likar du musikalar og kan tenkje deg tre fulle dagar med song, dans og teater?
Då er langkurs i musikal midt i blinken for deg!

På dette langkurset vil du saman med instruktør Asbjørn, jobbe med utdrag frå kjente musikalnummer og setje saman desse til ein eigen minimusikal som gruppa kan framføre siste dag.

Du vil få jobbe med både tekst, replikkar, song, dans og regi - og du får erfare korleis ein skal jobbe saman som eit ensemble i ei framsyning. Kurset passar både for deg som har stått mykje på scenen og spela i musikalar tidlegare, og deg som berre ønskjer nye, kreative utfordringar. Det er viktig å kunne tørre og å by på seg sjølv.

Vil du ha eit lite avbrekk frå dei meir fysisk krevjande kursa, eller ønskjer du å fylle alle dagane med mest mogleg handverk?

På Sommarleir tilbyr vi tre kortkurs i handverk:

Spikking

Har du lyst til å lage noko og lære korleis du kan halde spikkekniven på rett måte? Spelinstruktør Åsmund er ikkje berre musikalsk, han er også god på handverk. Er vêret godt, vil han ta deg med ut i frisk luft, finne fram knivar og spikkeemne og vise deg grunnleggande teknikkar i spikking. Om du blir ferdig med å lage noko under kurset, er ikkje så farleg, for du kan alltids gjere det ferdig etterpå. Kva vil du lage?

Origami

Origami er kunsten å brette papir om til ein blome, ei trane, ein boks eller eit papirfly. Har du lyst til å lære deg å brette eitt og anna av fargerikt papir, så bør du bli med på dette kurset. Kan hende også du har nokre bretteferdigheiter du kan dele med dei andre på kurset?

Geriljabroderi

Geriljabroderi er ein kreativ måte du kan formidle eit standpunkt, slå ein vits eller vere litt på kanten, om du vil. Du har kanskje vore borti det før?

Med nål, tråd og stramei kan du leite fram kreativiteten din og brodere eit lite bilde eller ein lapp som du kan henge opp eller sy fast på jakka di. Lene er veldig glad i å brodere sjølv, og lærer villig vekk korleis du kan skrive med korssting.

Lag ditt eiget handlenett av mormors gamle gardiner (AVLYST)

Gjenbruk, ombruk og omsaum er i vinden som aldri før. Kan hende mormor har eit par gamle gardiner som aldri blir hengt opp igjen, eller kva med den øydelagde buksa di?

På dette kurset får du 2,5 timar til å sy ditt eige handlenett. Etter kurset kan du gå strake vegen til matbutikken og fylle det opp med snacks og godteri.

Felestiller

Dette er eit kurs for deg som spelar fele og som vil lære meir om korleis du kan stille om instrumentet ditt og få ein annan dur!
Gamle felestiller er utbreitt i norsk folkemusikk, og på Sunnmøre og i Nordfjord er det fleire slåttar på gamle felestiller. Tradisjonen fann ein til og med i den klassiske musikken frå barokken, men der har den diverre døydd ut, heldigvis for oss lever det i beste velgåande i folkemusikken. Instruktør Åsmund vil vise deg korleis du kan stille om fela di og spele slåttar som ikkje går and til vanleg

Folkemusikkimpro 

Musikk kan vere så mangt og musikken kan bli skapt her og no. På dette kortkurset vil instruktør Åsmund lære deg å leike med instrumentet og du får prøve deg på fri, improvisert musikk! Du kan utforske nye lydar, forske på instrumentet ditt og finne ut kva musikk også kan vere. På dette kurset er det ikkje noko som er rett eller gale.

Improvisasjon

Å improvisere er å finne på noko "der og då". Mange som held på med teater er godt kjend med improvisasjon og på dette kortkurset vil instruktør Asbjørn lære deg nokre verktøy til å bli betre på nettopp improvisasjon. Du behøver ikkje ha drive med improvisasjon for å bli med på kurset, men det er viktig å tørre å prøve nye ting. På dette kurset kjem du til å ha mykje moro!

Scene-tilstedeværelse

Å stå på ei teaterscene kan by på nokre utfordringar. Kanskje er du sjenert, kanskje du er usikker på kva du skal gjere eller kanskje publikum kan lbi litt for stort?
På dette kurset vil instruktør Jawad utforske viktige grep for å ha ein sterkare tilstedeværelse på scenen. Du vil lære korleis å beseire sceneskrekk (moderert). Kurset passar for deg som er ekstra interessert.